Limrur frá Bjarna Björgvins
Ritstjóra hefur borist bréf:
Sæll vertu ritstjóri,
þakka þér fyrir síðast.
Þótt seint sé sendi ég hér limrurnar sem ég gerði um "fylgifiskana" í Gopshus. Þær urðu til laugardaginn fyrir Vasagönguna þegar markmið dagsins var að hvíla sig éta sem mest og sofa. Þar sem flestir eru óvanir slíkri iðju varð að finna sér eitthvað til dundurs. Ég drap tímann m.a. með því að semja limrur um þá austanmenn félaga mína og Björn Má leiðtoga okkar. Allar eiga vísurnar sér forsögu í raunveruleikanum en raunveruleikinn síðan teygður og togaður í ýmsar áttir eins og vera ber.
Þegar við höfðum drukkið orkudrykki og étið pasta í marga dag hafði Auðbergur Jónsson orð á því að hann væri orðinn svo orkuríkur að hann vissi ekki hvort hann gæti stöðvað sig í göngulok eða þegar á þyrfti að halda í sporinu.
Orkan í Auðbergi´er slík
að aldrei nein sést hefur lík
út um allan skóg
hann æðir í plóg,
ég undan með naumindum vík.
Björn Már var sérfæðingur okkar í skíðaáburði og leiddi okkur í sannleikann um notkun á "burkvalla" og klístri og hvernig á sama tíma næst rennsli og viðspyrna á skíðunum. Með kennslunni var drukkinn orkudrykkur eins og jafnan áður.
Að drekka er drengja siður
og drjúgur á Bjössa er skriður
er hann stendur á blístri
af "burkvalla" og klístri
og með orkudrykk neyðir það niður.
Óttar Ármannsson fór til Mora til þess að láta mæla skíðin sín og bera á þau fyrir gönguna. Á leiðinni heim gengum við fram á merkilegan karl sem seldi bjarndýrspylsur, elgs- og hreindýrabjúgu. Tókst honum að pranga slíku inn á okkur, en þegar við vorum komnir áleiðis að bílnum uppgötvaði Óttar að hann var með fullan poka af bjúgum, en hafði gleymt nýábornum skíðunum hjá sölutjaldinu.
Við Óttari´ á eftir þjótum
hann er ekki með á nótum,
því hátt upp til hlíða
helst vill hann skíða,
með bjúgu á báðum fótum.
Pétur Heimison hafði áhyggjur af því að þegar hann lyki Vasagöngunni myndi hann lenda í myrkri síðasta spottann til Mora. Í sölutjaldinu fann hann forláta ennisljós sem hann ætlað að hafa með sér í gönguna og bregða á enni sér þegar færi að skyggja. (Reyndar gleymdi hann ljósinu heima á göngudaginn, sem kom að vísu ekki að sök).
Þegar dagsbirtan tekur að dvína
verður dagljóst frá Mora til Kína
Þar Pétur ég kenni
með perur á enni,
"sá lætur í ljós sitt skína".
Stefán Þórarinsson leiddi "þá drengina" Pétur og Óttar með sér og kenndi þeim sitthvað um Vasagönguna og annað sem þeir þurftu að standa skil á. Var hann jafnvel farinn að borga fyrir þá í búðunum, þannig að fljótlega fóru þeir að kalla hann pabba eða Vasapabba og gekk hann undir því nafni í Gopshus.
Stefán langar til Mora að labba
með lærisveinum og rabba
við Óttar og Pétur,
hann áfram þá hvetur,
þeir í tilbeiðslu trúa á "pabba".
Þetta var frábær tími í Gopshus, hópurinn einstaklega léttur og skemmtilegur og gangan sjálf nokkuð sem maður gleymir ekki þótt gamall verði. Bestu þakkir til allra samferðamanna og hver veit nema maður gleymi verkjunum í fótum, handleggjum, já öllum skrokknum þann 5. mars sl. og mæti aftur seinna reynslunni ríkari. ( Þetta er náttúrulega bilun.)
Bestu kveðjur
Bjarni G Björgvinsson.
Limrur frá Birni Má
Ritstjóra hafa borist tvær limrur frá Birni Má göngukappa sem fara hér á eftir. Sömuleiðis hefur borist drjúgt af ljósmyndum frá Birni og Stefáni sem bíða birtingar og verða opinberaðar innan skamms.
Þessi er tileinkuð skiltinu sem segir Mora 87 km:
Nú væri ljúft að lúra
liggja í bælinu og kúra
og fá sér einn öl;
ó þetta böl.
Mikið andskoti er langt til Mora.
Hin varð til þegar Auðbergur kom hróðugur með skíðin nýslípuð og glíðuð:
Loks lét Auðbergur skíðin skúra
og slípa eftir erfiða túra
svo glíðið vel fá´ann
þó er geigur að hrjá´ann
hvort geti hann bremsað í Mora.
Myndasafn komið upp
Nú hefur vefstjóri sett upp myndasafn með myndum úr Vasagöngunni. Þangað er ætlunin að bæta fleiri myndum síðar, en sem stendur eru þar rúmlega 90 myndir.
Nokkrar myndir
Hér eru nokkrar myndir frá Sissý og Dóra. Fleiri myndir eru væntanlegar innan tíðar.
Stuðningsliðið á hliðarlínunni í hálf-vasa.
Hvatning við Gosphus í heimsbikarkeppni kvenna, deginum fyrir Vasagönguna sjálfa. (Ef myndin prentast vel má sjá votta fyrir sporinu sem lagt var frá brautinni að hyttu nr. 1 (sem sést í bakgrunni) í þeim tilgangi að afvegaleiða keppendur.)
Pasta snætt í bjálkahúsinu í Mora: Bjarni, Hannes og Björn Már (ekki er vitað hver maðurinn við borðsendann er).
Vasakallinn sjálfur við markið í Mora.
Feðgarnir Blái lótusinn, Svarta mamban, Sigurður og Rauði baróninn fyrir ræsingu.
Fylgifiskur og frændlið fyrir ræsingu: Sigurður R., Hannes, Nonni, Skúli, Siggi, Gunni, Jóhannes, Hjörleifur og Stefán.
Frændur og læknar: Hannes, Skúli, Nonni, Óttar, Siggi, Gunni, Jóhannes, Hjörleifur, Stefán og Pétur.
Kempur komnar heim
Þá hefur útsendur fréttaritari aftur tekið við ritstjórnarhlutverkinu. Aðstoðarristjóra eru færðar bestu þakkir fyrir vel leyst verkefni sem og öllum sem sent hafa kveðjur.
Eftir því sem best er vitað eru nú allir fjölskyldumeðlimir komnir heim og síðustu fylgifiskarnir ættu að vera í loftinu frá Osló til Íslands.
Erfitt færi
Fyrir þá sem heima sitja og velta fyrir sér hvað olli að svo margir úr hópnum náðu ekki að klára er rétt að geta þess að færið var sérlega erfitt í ár; mikið um nýfallinn snjó sem gerir að verkum að sporin eru mjúk og veita hvorki stuðning né mikinn hraða.
Þetta sést glögglega á því að sigurvegarinn í ár vann á tímanum 4:38, en metið er 3:38 (ef ritstjóra misminnir ekki) og að jafnaði er sigur að vinnast á ca. 4 tímum. Og sigurvegarinn startaði ekki með rúmlega 14 þúsund keppendur fyrir framan sig til að spilla sporinu.
14.804 voru ræstir, en 12.995 skiluðu sér í mark. Það þýðir að 1.809 féllu úr leik á leiðinni, eða um 12%. Í venjulegu ári eru það milli 500 og 1.000 sem falla úr leik og sem dæmi má nefna að þegar þeir bræður kepptu 2004 þótti færið með eindæmum vont (enda hitastig yfir frostmarki) og þá féllu um 1.000 úr keppni.
Loks má nefna að þegar stuðningsliðið mætti í Mångsbodarna, þremur kortérum "fyrir reipi" og allir okkar keppendur aðrir en Halldór og Sveinn ókomnir þangað, voru þegar tvær rútur fullar af keppendum sem höfðu ákveðið að hætta.
Til áréttingar
Bræðralag reipisbrunninna frænda vill taka skýrt fram að Sigurður tók sjálfur þá strategísku ákvörðun að hætta í Mångsbodarna áður en kom að kaðlastrekkingum og hlýtur því ekki inngöngu í bræðralagið, hvurs meðlimafjöldi fimmfaldaðist á sunnudag (fyrir var einn heiðursfélagi en nú hafa bæst við fjórir nýbrunnir, staðráðnir í að vinna sig upp í heiðurfélagatign).
Væntanlegt...
Ritstjóri vonast til að geta bætt inn fleiri frásögnum, myndum og kveðskap á næstu dögum og hvetur því lesendur til að líta reglulega við.
Kveðjan sem hvarf
Í kveðjuflóði sunnudagsins var ein kveðja sem lenti milli stafræns stafs og hurðar, en birtist hér með:
Sendum hinu glæsta gönguliði sigurdagskveðju úr höfuðstöðvum HSA. Megi Íþróttaálfurinn fylgja þeim á hverri leið !
Svíþjóðu prýðir fylking fríð
frægð nú víða hafið náð:
Farið á skíðum fram með hlíð
fagurt skríðið yfir láð.
Verðlaun munu fá þið fljótt
fyrir göngu slíka
og sendir verðið með Silvíu Nótt
að sigra heiminn líka
Einar Spivy
Keppandi kveður
Auðbergi varð að orði eftir erfiða reynslu dagsins:
Í Mångsbodarna fékk ég fast á trýnið
fjárans spottann, það var ljóta grínið.
Afgangs er þó
af orkunni nóg.
Kvöldið nálgast, konurnar og vínið.
Kveðjur
Sæl öll sömul.
Innilega til hamingju með þetta stórkostlega afrek. Einnig vil ég segja að þið sem komust ekki alla leið og lentuð í þessum fræga kaðli (Skúli, voru skærin ekki nógu beitt) megið vera stolti af ykkur, það þarf nefnilega heilmikið þor og gott form að ætla sér að taka þátt í þessari miklu keppni. Aðstæður í ár voru mjög erfiðar samkvæmt áraðanlegum heimildum og því er ég vissum að þið reynið aftur að ári! Ég vona að ég fái glæsilegan hóp með mér þá.
- Þið sem flæktust í kaðlinum.
- Svo náttúrulega allar stelpurnar Birna, Sissý, Bryndís, Bergþóra og Kristín, er það ekki?
- Og svo allir hinir sem ætla sko að bæta tímann sinn...
Faðir minn heitin Ebeneser Þórarinsson náði tímanum 5:53:32 árið 1952 og var 14% eftir fyrsta manni. Ég mun sennilega aldrei ná þeim tíma en það skiptir ekki máli, ég væri mjög stolt að ná í mark.
Bestu kveðjur
Auður gönguskíðaþjálfari.
Sælir Vasabræður allir og til hamingju með árangurinn.
Ljóst er að viðmiðunartími sem settur var í fyrra (10.01.32) var rústaður. Það er gleðilegt að sjá hvað sá tími hefur verið tekinn alvarlega. Þetta hefur verið magnaður dagur við skjáinn í dag, og ekki síðri en Ólympíuleikarnir í Tórinó.
Aftur til hamingju og við munum taka ykkur til fyrirmyndar á næsta ári og nota eitthvað af þessum fínu tímum til viðmiðunar (æfingar hefjast 6:30 í fyrramálið)
Kveðja.
Magnús B. Vasabróðir.
Vasagangan mikla er hafin yfirstaðin!
Þá hafa allir "Þórarinsson" keppendurnir lokið Vasagöngunni 2006. Allir sýndu þeir mikinn keppnisvilja og þrek og náði helmingur fjölskyldunnar að skila sér alla leið til Mora sem verður að teljast mjög góður árangur.
Rauntími fjölskyldukeppenda voru sem hér segir:
- Halldór Þórarinsson 08:48:22
- Stefán Þórarinsson 09:56:26
- Hjörleifur Þórarinsson 10:00:19
- Hannes Þór Halldórsson 10:39:34
- Gunnar Sigurðsson 11:07:25
- Þórarinn Alvar Þórarinsson 06:41:31 (47,1 km)
- Skúli Sigurðsson 06:41:57 (47,1 km)
- Jóhannes Vollertsen 06:59:33 (47,1 km)
- Sigurður Þórarinsson 03:43:52 (23,7 km)
- Jón Þór Sigurðsson 03:48:05 (23,7 km)
En Vasafjölskyldan var nú alls ekki ein um afrekin því fylgifiskar hennar stóðu sig með mikilli prýði og náðu flestir til Mora.
Tími þeirra var svohljóðandi:
- Sveinn Ásgeirsson 07:01:20
- Björn Már Ólafsson 10:39:11
- Sigurður R. Sveinsson 10:53:33
- Ásgeir B. Böðvarsson 10:53:33
- Óttar Ármannsson 11:02:56
- Bjarni Björgvinsson 11:22:16
- Pétur Heimisson 11:23:30
- Auðbergur Jónsson 03:58:35 (23,7 km)
Þá er stórum degi lokið og hetjurnar fara að huga að heimför. Sögur þeirra munu án efa koma hingað inn á næstu dögum ásamt myndum frá ævintýrinu. Þannig að það er um að gera að fylgjast vel með þessari síðu næstu daga.
En sitjandi fréttaritari þakkar bara þeim sem hlýddu og óskar enn og aftur öllum keppendum, stuðningsliði og öðrum sem tengdust þessu þrekvirki til hamingju með afrekið.
Kveðja,
Sigmar Stefánsson
Stefán er kominn í mark á 9:56:26 og Hjörleifur fylgdi rétt á eftir á 10:00:19, glæsilegt hjá þeim báðum.
Þá eigum við í fjölskyldunni enn eftir þá Hannes Þór og Gunna og fylgjumst stolt með framgöngu þeirra.
Af fylgifiskunum er það að frétta að Auðbergur lenti í sama reipi og Nonni en aðrir hafa náð að sjá við sænskum reipum og stefna enn í mark.
Heil og sæl stórfjölskylda
Til hamingju Halldór og þið öll hin. Við bíðum spennt eftir hinum í mark.
Það hlýtur að vera rífandi stemning hjá öllum. Þvílík ferð á Halldóri. Það þarf kaðal á manninn í markinu í Mora eða ætlar hann að ganga til baka sömu leið? Ég klæðist Vasafötunum í tilefni dagsins.
Kveðja
Skarpi og Valla
Halldór var rétt í þessu að koma í mark í Mora á glæsilegum tíma, 08:48:22.
Elsku Vasa fjölskylda
Það er skrýtin tilfinning að vera handan hafsins þegar ævintýrið mikla stendur yfir. Þegar ég var að fara í rúmið í gær þá voru mennirnir okkar að koma sér fyrir á ráslínunni. Ég skellti mér því spennt á netið í morgunsárið til að kynna mér stöðu mála. Lýsingar fréttamanns okkar eru æsilegar og auðvelda okkur sem fjarri erum að taka þátt í keppninni. Ég fylgist stolt með úr fjarlægð og sendi frændum og bróður baráttukveðjur.
Auður: Vasa 2007 er málið!
Ykkar
Birna
Hannes Þór og Gunni rjúka enn áfram eftir brautinni ekki langt á eftir Stebba og Hjölla. Svíunum virðist þó því miður hafa tekist að krækja í Skúla og Jóhannes með köðlum sínum eftir 47,1 km vaska göngu. Þeir hafa þá líklega um leið náð að taka skærin af Skúla sem ætluð voru til að klippa á kaðalinn.
Halldór mun líklega ljúka göngunni fyrstur okkar manna, eftir um 40 mínútur samkvæmt sænskum útreikningum
Eftirgangandi garpar halda ótrauðir áfram og eru nú allir komnir yfir tímatökuhliðið í Risberg
Vaknaði með andfælum og leið eins og og ég hefði misst af Vasagöngunni, var litið á klukkuna 7:15 þetta var í lagi ég var nú ekki búin að missa af mjög miklu. Mér líður hálfpartinn einsog ég sé sjálf að fara að keppa, með hnút í maganum og ægilega spennt. Því miður hefur eitthvað komið upp hjá Sigga því hann hefur hætt í Mangsbodarna. Það hafa greinilega verið erfiðar aðstæður í byrjun. Ég held að af íslendingum öllum sé Magnús Eiríksson reynslubolti, frá Siglufirði í forystu með áætlaðan tíma 13:29 en þetta er 10. skiptið sem hann tekur þátt í Vasa. Ég veit reyndar ekki nöfnin á Landsbandaliðinum hans Daníels Jakobssonar.
Það var rosalega gaman að fá að upplifa smá af þessu ævintýri með ykkur í byrjun og fannst frekar fúlt að þurfa að fara heim á fimmtudaginn og missa af aðalgögnunni. En það var mjög gaman að fylgjast með hálfvasa og upplifa dugnaðinn í þessari fjölskyldu. Er rosalega stolt af ykkur og þið eruð nú BARA frábær og ofboðslega gaman að vera með ykkur. Takk fyrir mig.
Bestu kveðjur,
Auður Gönguskíðaþjálfari.
ps. Vonandi komið þið öll með mér í Vasa á næsta ári.
Heil og sæl
Við fylgjumst með ykkur og hvetjum ykkur til dáða. Ekki er laust við öfund í ykkar garð að ganga þessa skemmtilegu göngu. Áfram Ísland !!
Kveðja
Skarpi og Valla
"Kaðalsveiflandi Svíafíflunum" tókst að höggva stórt skarð í okkar hóp með því að stoppa Sigga og Nonna í Mångsbodarna. Ef að það reynist rétt er nokkuð ljóst að það eru nokkrir keppendur tæpir en við hér á fréttastofunni höfum fulla trú á að þeir nái að sigrast á erfiðum aðstæðum.
Þá hafa allir úr Vasafjölskyldunni brunað í gegnum Mångsbodarna og hafa aukið hraða sinn mikið eftir að greiðst hefur úr umferðinni!
Keppendurnir okkar lögðu af stað í morgun við mjög erfiðar aðstæður, 15° frost beit þá í andlitið og snjóhríð hjálpaði til við að gera bláberjunum og fylgisveinum þeirra þetta eftirminnilega ræsingu.
Fréttaritari okkar á staðnum lýsti því þó að heldur væri að birta yfir en lenti svo í umferðarteppu ásamt öllu stuðningsliðinu og hefur hann ekki látið í sér heyra síðan.
En aftur að hetjunum núna þegar að rúmir 3 tímar eru frá ræsingu. Allir okkar keppendur hafa gert sér lítið fyrir og komið sér yfir Smuguna, vafalaust lent í vandræðum með alla þessa óreyndu keppendur sem voru að þvælast fyrir sér en hafa ekki látið það stoppa sig.
Þetta virðist því byrja vel þrátt fyrir mjög erfiðar aðstæður og í þessum skrifuðu orðum eru fyrstu bláberin að skjóta sér yfir tímatöku línuna í Mångsbodarna, búnir með 23,7 km hvorki meira né minna!
Af atvinnumönnunum okkar er allt gott að frétta; Halldór hefur nýtt sér það að vera í fremri ráshóp en hinir og á því auðveldar með að koma sér áfram, enda færri sem þvælast fyrir. Stefán og Hjörleifur fylgja svo á eftir, sá yngri með dulítið forskot.
En fyrstu fréttir eru semsagt góðar fréttir. Við komum aftur eftir auglýsingar.
Kveðja
Við sendum ykkur baráttukveðjur og fylgjumst með ykkur á morgun elsku bræður og systkinasynir og treystum við því að stuðningsliðið á hliðarlínu hrópi hátt og hvetji okkar menn,
Gummi og Ingibjörg
Yfir til þín Þórarinn
Hér í Dölunum er stemningin að magnast. Lalli og fjölskylda skiluðu sér á föstudagskvöld og þar með voru allir komnir á svæðið. Undanfarið hafa menn dælt í sig kolvetnadrykkjum milli þess sem þeir sporðrenna tröllamatarskömmtum og skjögra um útbelgdir og ofurhlaðnir orku.
Hér ræða menn hitastig; fimm, tíu, tuttugu gráður og það er sjálfgefið að það er allt í mínus. Enda eru síðu nærbuxurnar ekki bara nauðsyn heldur hreinlega lífsstíll. Hér hefur kyngt niður snjó og ljóst að snjóleysi mun ekki plaga - heimamenn muna vart eftir jafn miklu af þessu hvíta í Vasagönguviku.
Á föstudagskvöld var formleg lokaæfing og þótti tilhlýðilegt að æfa lokasprettinn, þ.e. síðustu kílómetrana í markið (og hvernig taka skal við sigurkransinum án þess að missa ferð). Í dag var hejað mikið þegar heimsmeistaramót kvenna geystist framhjá og stíll þeirra grandskoðaður og í sjónvarpinu fylgst með þeim kílómetrana héðan og í mark.
Seinnipartinn hafa svo síðustu skíði verið smurð og þær græjur sem vantaði keyptar. Meðal annars keyptu þeir bræður Svarta mamban, Blái lótusinn og Rauði baróninn sér forláta úr og eru þar með tilbúnir að sjá við kaðlastrekkjurum sænskum.
Með í för slást aðrir fjölskyldumeðlimir og vinir með skíði í farangrinum, auk þess sem öflugt klapplið verður á hliðarlínunni.
Nú í kvöld er stefnt snemma í bólið áður en vaknað verður hálffjögur til að gleypa í sig hafragrautinn og leggja af stað út í nóttina á tveimur bílum. Nokkrir hafa farið á undan og gista hjá Hjörleifi í Sälen og græða þannig nokkurra tíma auka svefn.
Stemmningin er góð og allir biðja fyrir bestu kveðjur heim.
Þetta er Þórarinn Stefánsson sem skrifar frá Gophusgården í Dölunum.
Læknalimra
Ég hef aðeins kíkt inn á síðuna til að athuga hvort hagyrðingar í göngudeild lækna og lögfræðinga létu ekki svo sem einn kviðling fjúka, en lítið fer fyrir því. Þeir hafa trúlega öðrum hnöppum að hneppa blessaðir.
Hvað er það sem fyrst kemur upp í hugann og tengist ríki Svía. Fyrir utan Volvó og Emil litla í Kattholti eru það myndir á hávöxnum ljóshærðum konum. Þá fer maður nú að skilja hvað hljótt er um læknanna, enda jafnan bundnir þagnarskyldu. En fleiri eru í förum en þeir. Ein limra út frá þessum vangaveltum.
Ljúf er með ljóskum að hrasa
þær læknana hafa í Vasa.
Þar spennan ei þver
en spurningin er,
við hvað er Bjarni að brasa?
Baráttukveðjur til göngugarpa.
Stefán Bragason.
Hvatningarkveðjur
Ágætu Vasafaraaðdáendur.
Þá eru þeir síðustu lagðir af stað af landinu bláa.
Hér kemur ein lítil limra - ekki mjög dýrt kveðin þó - sem varð til í nótt þegar beðið var eftir því að sonurinn færi með frændum sínum í loftið.
Heima við höngum og bíðum
þá hetjurnar (V)asast á skíðum.
Þetta er heilmikið hark.
Komast allir í mark?
Hrasa þeir kannski í sænskum hlíðum?
Með hvatningarkveðju
Ragnheiður mútter, systir og tanta
Kveðja
Komið þið sæl öll sömul í Vasa fjölskyldunni.
Við vorum nokkrar að fylgjast með Tótu og félögum í VASA og erum stoltar af okkar konu sem kom í mark fyrir 3 mínútum.
Kær kveðja, Ólöf, Þóra og Kalla
Fyrri keppnisdagur hafinn að baki
Þá eru allir komnir í mark. Þær systur hafa tekið hressilegan endasprett og saxað á Sissý og Bryndísi, þótt þær mínútur sem munaði á ræsingunni hafi haft sín áhrif á að þær skiluðu sér seinna í mark. Rauntímar okkar keppenda eru sem hér segir:
- Halldór Þórarinsson: 03:08:06
- Sigríður Wöhler: 04:48:49
- Bergþóra Baldursdóttir: 04:54:18
- Bryndís Kristiansen: 04:55:11
- Kristín Baldursdóttir: 04:55:20
Glæsilegt.
Halldór hefur skilað sér í mark á tímanum 03:08:06 sem hlýtur að teljast glæsilegt (með meðalhraða um og yfir 14 km/klst). Sissý og Bryndís virðast fylgjast að og stefnir í að þær skili sér í mark rétt rúmlega 14 að sænskum tíma (13 að íslenskum), þær systur Kristín og Tóta voru um kortéri á eftir þeim í Hökberg og hin sjálfvirka tímataka gerir ráð fyrir að þær skili sér í mark um kl. 14:25.
Halldór æðir yfir sænska grundu sem eldibrandur og er núna búinn að skila sér gegnum Oxberg eftir 1 klst. og 9 mínútur á tæplega 14 km/klst meðalhraða. Vasatölvur reikna nú með honum í mark kl. 12:12 að sænskum tíma.
Þá er hálf-vasan hafin. Ræst var klukkan 8 að íslenskum tíma (9 að sænskum) og nú er bara að bíða og sjá hvenær þátttakendurnir taka að skila sér til Oxberg sem er fyrsta tímahlið, en þangað er drjúgur spölur.
Tímatökuflögurnar sýna hvenær keppendur hafa farið gegnum ræsihliðið. Það er greinilegt að Halldór hefur troðið sér í fremstu röð í ræsingunni því hann fór yfir línuna klukkan 9:00:06! Bryndís og Sissý fóru yfir strikið klukkan 9:11 og þær systur Kristín og Tóta klukkan 9:17.
Enn er kveðið
Ritstjórn hefur borist bréf:
Fyrripartinn frænku minnar botna ég svo, eftir að hafa gert mér grein fyrir því að nær allir heilsugæslulæknar okkar eru nú flúnir land og eru farnir að „vasast" í öðru.
Heimsfrægðin hellist nú yfir
heimilislæknana okkar.
Í Vasa hver "lasarus" lifir
við Lagarás hrannast upp skrokkar.
Svo eru góð ráð, og ekki svo dýr, til fylgifiskanna í Vasa sett í limruform.
Nú sýna ber andhverfu asa
við át jafnt sem lyftingar glasa.
Og hang´ ei sem fauti
með hendur í skauti
né viðhafa biljarð í Vasa
Hér á í skyndi að skíða
og skunda um grundir til hlíða.
Göngunnar njóta
með gleitt milli fóta
því nágengur nuddast svo víða.
Baráttukveðjur af Héraði,
Stefán Bragason.
Ritstjóri sjálfur getur ekki stillt sig um að láta ljós sitt skína, en þarf þó bæði að stela rímorðum og snuða örlítið hina braglegu fagurfræði.
Heimsfrægðin hellist nú yfir
heimilislæknana okkar.
Marki og medöljum fyrir
sniglast þó mörgþúsund skrokkar.
ÞS.
Borist hefur botn
Það eru ekki einungis fjölskyldur Þórarinsson-ættbálksins sem fylgjast með gangi mála, til marks um það er eftirfarandi botn sem ritstjórn hefur borist frá Heimi Bjarnasyni, föður Péturs Heimissonar fylgifisks.
Heimsfrægðin hellist nú yfir
heimilislæknana okkar.
Doktor sá lengi lifir
lífselexir sem kokkar.
Vasavísa til Stefáns
Michael Clausen barnalæknir sendir Stefáni þessa kveðju:
Þeir segja 'ann ætli að skíða í Vasa.
Glaðbeittur en ekki með asa.
Ég segja verð,
hafðu góða ferð
Gættu þín bar'ekki að hrasa.
Við þetta er að bæta fyrriparti sem Snædís móttökuritari á Heilbrigðisstofnun Austurlands skellti fram um yfirvofandi heimsfrægð læknanna frá Egilsstöðum:
Heimsfrægðin hellist nú yfir
heimilislæknana okkar.
Botnar óskast.
Tekið er á móti kveðjum jafnt í bundnu sem óbundnu máli í netfang ritstjórnar: vasa@thorarinn.com.
Garpar í útvarpi
Halldór og Skúli voru í viðtali í Samfélaginu í nærmynd á Rás 1 í morgun, þar sem þeir ræddu fyrirhugaða göngu og undirbúning hennar. Þeir frændur voru fyrstir á dagskrá og hægt er að hlusta á þáttinn á vef RÚV.
Bræðurnir Þórarinsson mæta á ný ásamt liðsauka
Þá er komið að því að endurtaka leikinn frá 2004. Bræðurnir Þórarinsson eru mættir aftur til að spreyta sig á 90 km Vasagöngunni þann 5. mars, að þessu sinni með liðsauka eiginkvenna, barna og fjölskylduvina.
Þórarinn elstibróðir (einnig þekktur sem Lalli laaangflottasti) er reyndar ekki í hópi keppenda að þessu sinni, en gegnir hins vegar hlutverki Fjallkonungs og stýrir hliðarlínusveit slektisins ásamt hinni margreyndu Fjallkonu Sissý.
Í stað hans kemur nafni hans Þórarinn Alvar og er einn af sex sonum sem taka þátt í ár. Birna Þórarinsdóttir stefndi á að keppa sem fulltrúi hins sterkara kyns, en vegna meiðsla varð hún að hætta við þátttöku.
Jóhannes Vollertsen Ragnheiðar mætir sem fulltrúi sinnar fjölskyldu í Vasagönguna og þær svilkonur Tóta og Sissý taka þátt í hálf-Vasa (ásamt Halldóri sem að sjálfsögðu gat ekki á sér setið að reyna að slá þeim bræðrum sínum við og stefnir bæði á hálf- og heilvasa).
Með í för slást aðrir fjölskyldumeðlimir og vinir með skíði í farangrinum, auk þess sem öflugt klapplið verður á hliðarlínunni.
Því hefur heyrst fleygt að sá hópur fylgifiska sem Vasalæknir fjölskyldunnar hefur fengið til liðs við sig sé sérstaklega samsettur í ljósi þess trausts sem þeir bræður bera til afkvæma sinna; fimm læknar og lögfræðingur sem fylgja munu hópnum til öryggis.
Fram að keppni mun hér verða skotið inn smáfréttum af stöðu mála og stemmningu eftir því sem ástæða þykir til, auk þess sem sérleg sveit tæknimanna og fréttaskýrenda mun sjá um að fylgjast með framvindunni keppnisdagana tvo. Meðan á keppni stendur munu tenglarnir hér til vinstri gera þeim sem heima sitja kleift að fylgjast með gangi mála eftir því sem keppendur skila sér gegnum tímatökuhliðin.
Netfang ritstjórnar: vasa@thorarinn.com